維他奶係香港街知巷聞嘅豆奶飲品牌子。維他奶喺1940年開始喺香港生產，到而家生產廠房已經遍佈中國大陸、香港、澳門、澳洲同美國等地。維他奶由創辦人羅桂祥研製，佢希望能夠為香港嘅一般家庭，提供一種既平、蛋白質又豐富嘅嘢飲，用嚟代替價格貴啲嘅牛奶。有「中國之牛」美譽嘅大豆，含有豐富蛋白質、而價錢又平，所以佢就用咗大荳，研製出維他奶嘞。