《千王之王2000》(The Tricky Master)係喺1999年出品嘅香港搞笑電影之一。

制作
喺澳門嘅路環監獄裡面，有個囚犯俾成大班人排住隊問佢攞賭錢貼士，就連看守警官都佩服佢嘅賭術，令到人人畀面，佢就係人稱「千王之王」嘅黃師虎。
而喺香港一間學校裡面，臥底梁寬正喺度暗中保護緊大地產商何生個女何千金，點不知喺樓下同佢照應嘅阿頭千面人俾一班綁匪挾持返轉頭，仲連何千金都劫走埋，好彩「瀟洒威武」嘅梁寬及時阻截，最後將幾個綁匪一一收拾，成功救返何千金；不過佢已經厭倦做低級臥底嘅生活，要求千面人俾佢做大案件，喺阿寬嘅苦苦哀求之下，千面人終於俾咗一單大案佢跟，就係要佢做嗰個人稱「肉面飛龍」嘅大老千法拉利嘅臥底，盡量收集犯罪証據，等警方可以夠料緝拿法拉利歸案。
阿寬喺沙灘遇到一個絕色尤物初戀，問到初戀嘅電話號碼之後就自己喺度發白日夢，點知俾法拉利嘅得力手下火龍同埋肥豬王捉住玩到陀陀擰，原來法拉利係借阿寬嘅出現嚟過橋去呃個有錢女嘅錢，而法拉利亦都收咗阿寬做佢嘅手下。夜深人靜，喺法拉利嘅大宅入面，阿寬一個人四圍巡，點知俾佢發現一個黑影閃過，追到電腦">電腦房用電筒一照，哩個黑影原來就係日頭喺沙灘遇到嘅美女初戀小姐；初戀正喺度下傳緊法拉利嘅犯罪証據，阿寬就同佢傾起上嚟，喺傾談中知道原來初戀都係俾法拉利迫害嘅一群，點知傾傾吓俾其他打手發現咗，於是阿寬詐諦被初戀挾持，兩個人逃離咗法拉利嘅追捕，但係初戀嘅肩膊就中咗一槍。
返到阿寬屋企，初戀挑咗粒彈頭之後就留喺房休息，點知哩個時候阿寬個女朋友PIZZA買咗宵夜上嚟，想提阿寬第二日要過澳門飲姐夫嘅生日酒，但係阿寬怕喺房嘅初戀會令到PIZZA誤會，於是作頭作勢帶咗PIZZA出去。
喺澳門某間酒樓嘅貴賓廳裡面，黃師虎個老婆WASABI正喺度好忙咁招呼緊親朋戚友，PIZZA就襯機會介紹咗男朋友阿寬俾佢家姐阿WASABI認識。冇幾耐成班人突然起哄又獻花又拍手，原來黃師虎到咗；佢入門口嘅情況可謂十分巴閉，除咗有一班擁躉沿途跟住歡呼之外，佢嘅左右兩邊仲貼身企咗個類似護法嘅人，就連WASABI點吓佢老公都俾保鑣聾五一腳踢到飛開，想o錫吓個老公都要咀咗個護法先，再由護法咀返黃師虎。不過踢爆咗原來哩兩個護法係監獄嘅獄警，因為特別原因先至俾坐緊監嘅黃師虎出嚟赴宴，之但係就唔可以同任何人有任何接觸。席間因為阿寬表示最痛恨老千，當眾挑釁黃師虎，點知俾黃師虎大肆侮辱返轉頭，最後搞到雞毛鴨血咁離開。
返到屋企之後，阿寬唔記得咗初戀小姐仲喺度，終於俾PIZZA發現咗，就嬲爆爆咁離開；初戀用美色勸掂咗阿寬一齊夾計對付法拉利，佢先詐諦俾阿寬綁住，然後帶咗返法拉利屋企，當係俾阿寬捉到佢；阿寬襯法拉利迫供緊初戀嘅時候，乘機走入電腦">電腦房下傳犯罪証據，而且通知埋佢阿頭千面人，叫佢快啲趕嚟緝拿法拉利。阿寬襯千面人未到，就想去救埋初戀，佢撞咗入房時見到張床嘅被單下面有個女人係咁嗌，就即刻衝上前隔住張被打咗個男人幾拳，點知一掀開張被見到個男人原來係大有錢佬阿孖成哥，原來佢同佢老婆嚟咗法拉利屋企作客，喺間房度搞嘢。阿寬搵極都搵唔到初戀，而哩個時候千面人帶住成班警察嚟到法拉利大宅，只見法拉利氣沖沖咁出嚟，仲否認佢識得阿寬，而孖成哥就係咁投訴。返到差館，阿寬下傳返嚟帶有電腦病毒">電腦病毒嘅光碟令到成個警局嘅資料銷毀哂，搞到俾千面人勒令即時停職。
阿寬一離開差館，即刻俾十幾人追斬，好彩跑到去路口嘅時候，駕住電單車嘅初戀及時趕到載咗佢走。去到初戀屋企，初戀即刻攬住阿寬喊，搞到阿寬一頭霧水，跟住表示想同阿寬交歡叫佢快啲除衫除褲，阿寬一時興奮，一個人喺廳度大跳脫衣舞，點知成個過程俾人用攝錄機偷拍哂，仲干擾埋電視台頻道作即時直播，等人人都睇到佢嘅醜態；當佢發現自己上咗電視嘅時候，初戀喺房走出嚟用電擊棒將阿寬電暈，跟住俾人載咗去大馬路踢咗佢落車示眾。
阿寬因為哩件事深深咁受到打擊，PIZZA見佢意志咁消沉，就勸佢去搵姐夫阿黃師虎學返幾招，然後再去對付法拉利同埋初戀，以報恥辱之仇。
阿寬喺澳門搶人手袋，諗住借犯罪俾人捉入監，然後拜黃師虎為師，點知入到去監獄嘅時候，原來黃師虎已經服刑期滿放咗監，搞到喺監獄度俾班囚犯大肆淫辱。
黃師虎喺屋企大開賭局，仲玩乜贏乜，就連同細路仔打遊戲機都唔放過；哩個時候阿寬帶住一臉痛苦咁出現，黃師虎知道佢嘅來意，於是就借故係咁閃，而佢老婆WASABI就勸黃師虎幫阿寬，最後黃師虎俾阿寬嘅誠意打動而收咗阿寬為徒。雖然已經拜咗師，但因為要喺短時間之內要學到有能力對付法拉利報到仇係一件唔容易嘅事，於是阿寬直頭叫黃師虎出山，黃師虎開頭點都唔肯，後來同意打賭如果阿寬呃得到佢就親自出馬對付法拉利。阿寬同WASABI幾個出哂奇謀怪招都呃唔到黃師虎，後來法拉利嘅助手火龍帶住幾個手下嚟到黃宅，開槍打傷咗黃師虎之外仲炸咗佢屋企，於是黃師虎決定出山去搵法拉利算賬，仲突然轉性要送鑽石俾佢老婆，嚇到WASABI大叫救命。
黃師虎叫阿寬不斷重覆咁睇一段電視新聞，係報導有關於兩個有錢佬鄭一筒同埋諗伯失蹤咗成個星期，搞到股市大幅下滑嘅消息，叫阿寬可研究吓哩段新聞有咩竅妙，跟住傳呼阿寬約佢夜晚去法拉利屋企會合。
嗰邊廂，初戀出現喺一間會所嘅卡拉OK貴賓房，房裡面等緊佢嘅就係大有錢佬李孖成，佢襯住李孖成毛手毛腳嘅時候一腳將孖成踢暈，然後裝入紙皮箱叫人運走。出到去會所門口時，見到一個好似黃師虎嘅人喺佢面前經過，佢上車之後就即刻打手提電話">手提電話匯報俾法拉利知，點知講講吓黃師虎突然插咀，於是法拉利就叫初戀帶黃師虎去見佢。
黃師虎見到法拉利，兩個人客套咗一輪就提議打台灣麻雀，而且要一舖定輸贏；黃師虎憑住佢高超嘅千術，贏咗一億幾港紙，跟住仲相約幾日後開一場億元大賭局，每人預備五億做籌碼，喺限定時間之內鬥贏得多，邊個贏最多錢就可以贏哂對方嗰五億元，仲要立紙為據；哩個時候阿寬幾個嚟到，黃師虎就叫阿寬代佢簽哩份合約。
黃師虎推測到嗰三大富商係俾法拉利綁架咗，想借賭局分散注意力，等股市跌到得返三四千點嘅時候就乘機搵大錢，於是佢漏夜潛入法拉利屋企特登俾人捉住，終於俾佢見到三大富商，一齊被困喺密室一個大監牢裡面。
哩一晚法拉利屋企人頭湧湧，除咗好多嚟睇賭局嘅賓客之外，仲有嚟自賭業聯盟嘅幾位代表做監場，監察賭局嘅進行。阿寬同法拉利開始賭局嘅同時，WASABI同PIZZA就喺大宅四圍搵黃師虎嘅下落，卒之俾佢哋搵到個密室，正當制服咗個守衛想開鎖救人之際，初戀突然出現，於是三個人打起上嚟，最後都成功救咗黃師虎同埋三大富商出嚟。至於賭局方面，阿寬一直採取消極嘅態度應付，就係為咗等黃師虎喺限時之前出現，可以贏返轉頭，不過雖然黃師虎及時出現要求接力完成賭局，但係就因為公平嘅原則而受到國際賭業會長嘅阻止。
經過一輪嘅爾愚我詐，黃師虎同阿寬最後都贏到哩場賭局，仲粉碎咗法拉利喺股壇上獲利嘅卑鄙行為，俾假扮荷官嘅千面人繩之於法。