尖沙嘴東，簡稱尖東，係香港尖沙嘴東面擴展部份，主要係密度較為低嘅商業區，裏面有酒店、寫字樓、各種餐廳。香港政府亦都響呢度起咗香港歷史博物館、香港科學館呢啲文化設施。
尖沙嘴東原本係九龍紅磡灣嘅一部份，1960年代，香港政府將漆咸道南以東嘅海填平來發展。尖沙嘴東個範圍一般係，西面去到漆咸道南，北面去到輰運道，東面去到康莊道，南面就同維多利亞港相鄰。所以康莊道東面嘅填地就唔屬於尖沙嘴東，而係紅磡嘅範圍。
政府響尖東海邊起咗條尖沙嘴海濱長廊，由紅磡國際郵件中心，沿住尖東海皮，一直伸到尖沙嘴天星碼頭，係遊人勝地。同海濱長廊拍住嘅係梳士巴利道，係區裏面一條大馬路。
響2004年，九廣東鐵伸到入尖沙嘴東，重響區裏起咗個總站，叫尖東站。呢個站起咗好多行人隧道伸到入尖沙嘴，重遠到去響彌敦道嘅地鐵尖沙咀站。